لســــة


رغم احتضار الضى
ف شرنقه الغروب
لسه الرغبه حامل
ف الاحتمال
لسة الدايرة
بتحلم بالاكتمال
وبخروج الحلم
من عباية الامتثال
يبعتر الامل عصافير
محمومه بالرغبه
والبراح
تفرد غناها
وتبوح بالتفاصيل
لكن ياهلترى
هيكمل المشهد ؟
ولا الوهن هيدوس
على اخر نفس ؟
ينفض المهرجان
ويموت العشق
ف ترانيم الفرس
استفسار
مش اخير
إمتى القدر
هيمشى من غير
حرس ؟

بسافر سنين فيكى
وبارجع بنفس ارتجافى
وخوفى
لاندعه صمت من عشقى
تعكر صفو سماواتك
ترفض تفاصيل المساومه وتقرب
بسافر وبارجع بنفس اندهاشى
واستغرب
انا الفاتح بلاد العشق
ف عروقك
انا القادر على قرايه
متون الرغبه بين حسك
وانا المصلوب ف شجر
الضمه والاهه
بحرس لك غيطان امسك
شمسك حنه بعجنها
ومتبعتر عيدان عنبر
مبخرلك حنين همسك
قلبى امير مؤمنين الشعر
قصايده تعرفيها
من اثر سجودها لعينيكى
بسافر سنين فيكى كهل حكيم
وبارجع طفل
قدامك ياحبيتى متكهرب

النونو اللعبيه

النونو اللعبيه
ليا .. عليا
زى ماهيه
لامبلطج
ولاحاجه رديه
انا بس بحاول افهمها
النونو الحلوه اللعبيه
لاتفكر علشان م انا ساكت
انى بقيت لامؤاخذه هفيه
ولو حبًت تعرفنى وتسال
عايز ودنك بس شويه
حضنى المفتوح
ولا مركب نوح
فيه الاحزان
بالطول والعرض
وبرغم طوفان
قلبى المجروح
قادر اتريق
على طوب الارض
واكل عيشى
ولابس خيشى
ومسرح ف السوق دراويشى
واما الحظ يكيد ويعاند
بغمزله بعينى وطربوشى
وبقوله ياحلو استنانى
لما اقبض بس الجمعيه
علشان قوتى
ببلع صوتى
واتلون ولا ميت فنان
متمدد على
حجر سكوتى
بس غنايا بالف لسان
باين مهزوز
لكن اراجوز
بمزاجى اخسر
بمزاجى افوز
فارد طولى
زى نخيلى
واشطر من
فراقيع اللوز
تحت جفونى سهران قلبى
بيردد نفس الاغنيه
محمود كامل عوده

إفرد جناح الكلام و لمنا في ضله

إفرد جناح الكلام و لمنا في ضله